Jutro je friško, sonce još ni zišlo, klupa je malo rosna. Na placu je do tri vure v noč bil koncert. Naberem tam za vreču i pol plastičnih flaši. Taman za čike i burek. Vračam se v park, a pod mojom klupom spi pes. Čuje me, leno zdigne glavu, malo na stran, pak me na ležečki gledi. Smrdi po dimu, zapuščeni je i jadni. Jedino oči… oči su mu... dok bi me pogledal, kak da nekakvi čovek v njemu živi. Temne, gliboke, govoreče… Točno ga razmem: Gle, nemam kam. Nanjušil sam da je ovo nečija klupa, pak sam počekal. Prosim, če mi očeš biti pajdaš.
Sednem si na klupu bez reči, a on špičastoga nosa polegne prek prekriženih capi i tak nas dva počnemo skup živeti. Dajem mu ime Lero. Lero je sigurno najgrdeši pes v gradu. Po farbi vleče na hijenu z dugom dlakom i za broj prekratkim repom z kojim nigdar ne maše. Nigdar ga ne čujem lajati.
A ja sam Pero. Moji dani su si isti. Prvu rundu plastike berem rano vjutro. Če naberem za čike i burek, dobro, če ne, onda kupim samo čike. Pri Luciji v kafiču dobim sako jutro zabadava kavu za vun. Vrnem se do parka, Lero čuva klupu. Podelimo jesti, če imamo. Onda Lero povoše zraka i nekam se zaputi, saki dan na drugu stran i za vuru dve se vrne, tožen, vuha mu se obesiju, ne vidi se da mu desnoga pol fali. Siguren sam da nekaj išče. Točno v polne idemo skup nabavljat obeda. Pri “Napoleonu” dobim nekaj toploga, a Lero kosti. Popolne idemo još malo za plastikom, on me prati, voše okolo i ogledava se. Pred večer mu paše da ga počešem ze starom kefom. Nije več tak grdi i scufani. I tak dan prejde. Živimo skup već pol leta.
Na Badnjak v “Napoleonu” dobim pečenoga piceka. Veli šef Ranko:
- Pero, Badnjak je, častim! Nek ti je v slast i srečno ti bilo!
Lero i ja se pogostimo z polovicom, a pol si za Božić ostavljamo. Pojaviju se prve pahulje, ali nikaj zaozbiljno.
- E, moj Lero! - govorim mu ja - Ti i ja smo baš zaslužili jen drugoga. Ni lefko v živlenju ništ ne imeti, ali moraš se miriti z tem, znaš... Veliju da negdo odozgora se vidi i da sakoga čeka sud na kraju steze koju nemreš premeniti.
Lero me gledi z tem svojim glibokim očima bez da bi megnul. Točno verujem da me razme saku reč. Vužgem si čika.
- Lepi moj, - velim Leriju - srečen ti Božić, želim ti da najdeš to kaj celo vreme iščeš.
On žmegne z očima, teško si zdehne, oblizne se i zadremle.
Na Božič, v jutro, Lero naglo skoči kak da bi ga nekaj fpičilo, zagleda se po stezi na drugi kraj parka i odbeži. Prvi put vidim da beži. Gledim za njim, pozovem ga, ali nigdi nikoga. I kak je odbežal, više se ni vrnul. Prosinec je tek za Božić počel biti zdeni, dekice su mi pretenke. Moram iti spat v drugi kvart, v jeno spremište z alatom, polek kotlovnice od ambulante. Tu me na svoju roku pusti jen dober čovek, jemput sam mu našel i vrnul šretoflina z penezima i dokumentima. Par dni još hodam v park. Nikaj. Lero je zginul. Kak smo se zišli, tak smo se i razišli.
V sečnju i veljači tek na par dani curi malo sitnoga snega, zima je nikakva. Pred kraj ožujka se vračam v park. Paše mi znova dremati na toplomu proletnomu soncu. Senjam Lerija kak me liže po nosu. Otprem oči i - gle veselja! Lero! Jeden čistam novi zrihtani pes. Ima ogrlicu i značku, dlaka mu je lepo počesana, vidi se da je zdrav i nahranjeni. Ne smrdi več po dimu i maše z repom.
- Lero, pa kaj si to ti? Vrnul si se!
Spletem mu prste med dlaku, a on tak lepo zalaja kaj mi je bila milina čuti. Beži je sim tam, frcaju kamenčeki po stezici, brusi se v mene, baš je vesel, kak i ja. Dok se z njim poigravam, spazim na kraju steze pucku z vunenom kapom kak nas gledi. Stanem se i pogledam se v nju. Mahnem v pozdrav, ona nekaj zavikne, a Lero odbeži tam, još jempot se obrne, zalaja i onda zgineju za velkom tisom.
Srečen sam radi Lerija. Morti je moja božična čestitka nekaj vredila. On je našel kaj je iskal. Morti se saki koji ništ nema more nekak vrnuti v svet, morti se želje moreju zapraf nekak spuniti. Dok premišljavam, Lero zalaje tam na stezi i nazaj beži k meni, a za njim ona pucka za roku pela visokoga čoveka. Dojdeju do mene, ona me gledi z velkim plavim očima, a Lero polek sedi i krivi glavu.
- Dobar dan! - reče visoki čovek vu fajn ancugu - Ja sam Alojz. Ovo je moja kćer Marta.
- Dober den i vam, ja sam Pero!
Mala Marta dojde do mene i prime me za rukav.
- E, striček Pero, ja ću vam pokazati gdje Lero ima kućicu…
- Lero? - zinul sam - Moj Lero? Pa kak ti dete znaš da sam mu dal ime Lero?
- Striček Pero… haha, pa to mu je ime oduvijek, je l’ da tata?
- Da, da, zlato… Pero, vi ste taj beskućnik… Oh, oprostite, nisam vas htio…
Prvo sam tiho, ali onda sejeno postiha precedim: - Je!
- Pero, ne znam otkud početi. Lero nam je nestao prije par godina kad je Marta imala pet. Bila je neutješna, nije htjela drugog psa. Prošle godine smo čuli da je Lero viđen u ovom kvartu, tamo kod trgovačkog centra. Nismo ga našli. A onda, za Božić se odjednom pojavio pored Marte dok je s majkom išla na misu. Kakvo veselje, kakvo čudo, zamislite, ponovni susret nakon dvije godine. Vratio nam je radost u dom... no stalno bi nekud odlutao na par sati. Srećom uvijek se vratio, ali nismo znali kamo je odlazio. Kao da je nešto tražio.
Alojz govori, Lero gledi malo njega, malo mene i miga z onim celim vuhom.
- Jednog smo ga dana pustili da u šetnji on vodi, doveo nas je do ove klupe. Saznali smo od ljudi da vi živite u parku i da ste… pronašli Lera. Prepoznali su ga. Ali nisu znali gdje ste. Od nove godine dolazimo, ali uzalud. Sve do danas. - pogledal je Martu, a ona je zagrlila Lerija.
- Je, denes sam se vrnul. Bil sam v alatnici pre Iviju prek zime, tam je jedna kotlovnica, pak sam…
- Pero… oprostite što vas prekidam, neću puno okolišati. Mi nismo siromašni ljudi, imamo sve što nam treba. Znamo prepoznati dobro. Vi ste dobar čovjek, osjećam to. Lero vas voli, brinuli ste o njemu, zahvalni smo vam. Među vama očito postoji veza. Da vas pitam: Znate li raditi s kosilicom, alatima, ukratko... znate li uređivati vrt, okućnicu? Ako ne, nema veze, možete naučiti...
- No, glečte…
- Želim vam pomoći, nudim vam zaposlenje kod nas u kuriji... bili bi naš privatni vrtlar, imat ćete gdje spavati, imat ćete što jesti, uređivat ćete vrt i dvorište, brinuti o Leru. Pristajete? Molim vas...
- Paaa, dobro, če vi mislite da bi… fala vam puno, fala vam… - jedva pogotnem slinu, a spametni Lero je poskoči i počne me oblizavati po nosu.
Od toga dana sam drugi čovek: Pero Krištič se vrnul v svet! Polek kurije je vrtlarska kučica z alatom i moja krasno vređena sobica. Tu je se kaj mi treba i toplo mi je. Jesti imam saki dan i to gospodski. Alojz me je dal celoga zrihtati, imam radno odjelo i pun ormar opravi za obleči dok kaj zbavljam v gradu. I još plaču dobivam. A najlepše mi je kaj smo Lero i ja skupa. Denes verujem da je to kaj sam mu ime pogodil, morala biti sudbina.
To isto leto, na Badnjak, idem prešpancirati Lerija po gradu, do parka, do naše klupe. Sednem si, on polek mene, saki ze svojim mislima. Pojaviju su se prve pahulje kak i na lanjski Badnjak. Pogledamo se, a njegove gliboke, temne, čovečje oči mi govoriju: Vidiš, baš kak si rekel, negdo tam odozgora sakomu nacrta stezu. Srečen ti Božič! Fala ti kaj si moj pajdaš.
Ime mu je Lero. Lero je sigurno najlepši pes v gradu.
(A. Horvat, 2019.)
